Shree Krishna Leela Tarangini Part 1

                        श्री कृष्ण लीला तरङ्गिणी
                                प्रथमस्तरङ्ग:

श्लोक:   हिमगिरितनया पत्यं हेमाचल चाप समुदितम् तेज:
           किमपि महत्तममाद्यं स्मर्तव्यं विघ्नतिमिर हरणाय ।।१।।
           गिरिराजसुतासूनु: करिराजवरानन:
           परिपन्थिगणध्वंसी सुरसेव्यो विराजते ।।२।। 

                       गीतं ।।१।।

              मोहनम्      अटताळशापू

प ।         जय जय स्वामिन् जय जय ।
अनु ।       जय जय जितवैरिवर्ग प्रचण्ट ।
             जय जय गजमुख जय वक्रतुण्ड ।      - जयजय ।

             मूषकवाहन मुनिगणवन्द्य
             दोषरहित दुरितासुरबृन्द
             शेषभूषण शिववारिधिचन्द्र
             पोषितपरिजन पुण्यैककन्द ।            - जयजय ।।१।।

            अद्रिसुतासुत अनवद्यचरित
            भद्र भक्तभव भयहर मुदित
            रुद्रोदित ऋजु-मस्तकसहित
            सद्रूप सरसिज समुदितविनुत             - जयजय ।।२।।

            लम्बोदर धीर लावण्य सार
            कम्बुसुधानिधि कर्पूरगौर
            साम्बसदाशिव सत्कृतिचतुर
            सामवेदगीत सकलाधार                 - जयजय ।।३।।

            शक्रादिसुरगण सन्नुत चरण
            शातकुम्भमणि दिव्याभरण
            धिक्कृतघनविघ्न तिमिरावरण
            धीर नारायण तीर्थ सुकरुण              - जयजय ।।४।।